Noa's Interview (O correo galego):  September 1st 2002.

    NOA: "LOITO CONTRA A VIOLENCIA CANTÁNDOLLE  Ó AMOR E Á ESPERANZA"  E.F. Domingo 1 de Septiembre de 2002 ©

[A cantante Noa maniféstase radiante de felicidade desde que tivo un fillo, Ayehli, en   marzo do ano pasado. 'Now' é o novo álbum que sairá á venda en España o 17 de setembro]

  Anque con só dous anos, os seus pais se  trasladaron ó Bronx novaiorquino, volveu a Israel ós 17 anos por amor e a cumpri-lo servicio militar. Desde entón sempre amosou a súa preocupación pola situación da súa terra, "sobre todo agora que todo está moi deteriorado. A única maneira de demostrar que a xente da rúa non está de acordo co que ocorre é protestando'', di.

  "Eu loito contra a violencia -engadiu- cantando ó amor e á esperanza. Sinto unha gran pena pola xente que non ten compaixón e sinto moita máis por min, porque desde a miña illa de esperanza teño que vivir con eles na incerteza. Non quero morrer, pero agora que son nai daría a miña vida polo meu fillo, non por unhas persoas que poderían esforzarse por soluciona-lo conflicto e non o fan porque non teñen nin cariño, nin comunicación, nin respecto, nin amor''.

  Ó mesmo tempo, Noa está radiante de felicidade desde que naceu o seu fillo Ayehli en marzo de 2001. "Gústame moito a nova Noa -asegura- cambiaron moitas cousas na miña vida despois de ser nai, interna e externamente, realmente todo é diferente e mido as cousas doutra maneira''.

  En Now, un álbum que sairá á venda en España o 17 de setembro, Noa mostra que é "unha persoa moi intensa'' en todo o que fai. E, por fin, "despois de doce anos de colaboración xunto con Gil Dor -quen corrobora o que di Noa, á que sempre acompaña-, este álbum é algo creado entre nosoutros
dous, sen que ninguén interveña ou queira da-la súa opinión''.

  As maquetas dos trece temas de Now foron gravadas na casa de Gil. "Foi todo tan relaxante e máxico, que en seis das cancións mantivémo-lo son vocal das demos orixinais'', confesa.

  "Gil fixo un traballo sorprendente -asegura- iso permitiume concentrarme no meu bebé e en escribi-los textos, algo fundamental nas miñas cancións, antes que a melodía quero ter moi claro o que vou dicir. Por iso aproveito as viaxes que fago en coche, de casa ó estudio son unhas dúas horas, para darlle renda solta á imaxinación, e funciona, inspírame o estar en movemento''.

  Os textos de Now, xiran en torno á expectación, "escribiunos durante o embarazo e a chegada dun primeiro fillo non é comparable con nada máis'', e cre que neles dá resposta a moitas das cuestións que se formulou co seu anterior traballo Blue Touches Blue (2000), no que "recapacitaba sobre o pasado e o
futuro, e envolvíao cun son efectista''.

  Con Noa (1994), o primeiro álbum de carácter internacional, antes gravara en hebreo, reuniu cancións escritas entre os 15 e os 20 anos, "moi frescas e con arranxos moi sinxelos'', e con Calling (1996) ensinou que atravesaba un "momento moi intenso'', xa que por primeira vez tomaba contacto coa realidade política do seu país.

  Agora con Now amosa a súa preocupación polo "futuro incerto que nos espera, xa que estamos
rodeados de catástrofes naturais e conflictos ocasionados polo home, sen esquecernos da crise económica que atravesa o mundo e os problemas de medio ambiente e terrorismo que nos asolan'', comenta.

  Como foi habitual durante a súa carreira neste disco hai dúas versións, unha de Alan Parsons (Eye in the sky) e outra dos Beatles (We can work it out).

E.F. Domingo 1 de Septiembre de 2002 © 2002 www.elcorreogallego.es